Глыбокае

Віцебскія акругі аддадуць Мінску

На маючых адбыцца парламенцкіх выбарах у Беларусі будуць зменены межы выбарчых акруг. Мяркуецца, што іх колькасць у Мінску павялічыцца на 2 (з 18 да 20), а ў  Віцебскай вобласці адпаведна на 2 акругі стане менш. Аб гэтым паведаміла старшыня Цэнтрвыбаркама Беларусі Лідзія Ярмошына.
Па словах Лідзіі Ярмошынай, гэтыя змяненні «звязаны з тым, што горад Мінск расце, і трэба працаваць на перспектыву». Якія выбарчыя акругі на Віцебшчыне будуць "перакроеныя", пакуль невядома:  прапановы, якія датычацца змянення межаў акруг, накіраваны цяпер у выканаўчыя камітэты.
Старшыня Цэнтрвыбаркама таксама дадала, што з’яўленне новага заканадаўства, якое адмяняе прапіску грамадзян і ўводзіць рэгістрацыю, у пэўнай ступені ўскладніць падрыхтоўку будучай выбарчай кампаніі, работу са спісамі выбаршчыкаў. «ЦВК мае намер правесці адпаведную нараду з прадстаўнікамі МУС, дзе мы вызначым, як вырашыць праблемы, якія могуць узнікнуць», — сказала Лідзія Ярмошына.