Глыбокае

Закусім "Тызенгаўзам"?

 Новы гатунак сыру нядаўна пачалі вырабляць на Пастаўскім малочным заводзе. Назву новаму прадукту, напэўна, хацелі даць з патрыятычных меркаваньняў, але атымалася  крыху па-людаедску...

 Вядомы дзеяч Вялікага Княства Літоўскага Антоні Тызенгаўз пабудаваў у Паставах графскі палац, дом рамеснікаў, суконную фабрыку ды маслабойню. Шмат зрабілі для развіцця мястэчка таксама Канстанцін і Райнольд Тызенгаўзы. У гонар каторага зь іх назвалі сыр, вытварцы не ўдакладняюць. Напэўна, проста вырашылі, што  "Тызенгаўз" гучыць ня горш як "Эрдамер" , "Сав"ер" ці "Маасдам" – абы на замежны лад.

 Чамусьці чым больш папулярнае або вядомае імя, тым больш ахвотных скарыстацца ім у сваіх меркантыльных мэтах. У Віцебску, да прыкладу, адзін час гандлявалі гарэлкай "Шагал" і "Шагалаўскім" хлебам, пакуль грамадскасць горада не запатрабавала перайменавання харчовых вырабаў.