Глыбокае

Полацк можа атрымаць статус "горада-музея"

Падобная практыка абвяшчаць "гарадамі-музеямі"  гістарычныя і турыстычныя цэнтры  шырока вядомая ў іншых краінах. Да прыкладу, у Расіі такі статус маюць  Суздаль і Ноўгарад, у Нідэрландах – Амстэрдам, у   Францыі, вядома,  Парыж... Полацк мае шанец стацца першым "горадам-музеем" на Беларусі.
Яшчэ ўзімку Савет Рэспублікі Нацыянальнага сходу Рэспублікі Беларусь рэкамендаваў Міністэрству культуры хадайнічаць перад Саветом Міністраў,  каб надаць Полацку новы статус.  Гэтую прапанову падтрымаў і Нацыянальны Полацкі гісторыка-культурны музей-запаведнік.
Адна з перадумоваў атрымання статусу  "горада-музея"  -- гэта найбольшая колькасць культурных устаноў адпаведнага профілю – як гістарычных, мемарыяльных, спецыялізаваных і г.д. У Полацку  зараз працуюць адзінаццаць музеяў, а неўзабаве, магчыма,  з’явяцца і новыя.
Не так даўно ў выдавецтве “Беларусь” выйшла вялікая кніга – фотаальбом  “Полацк музейны”. Так што цяпер ганарыцца мясцовымі музеямі могуць не толькі палачане – багата ілюстраванае  выданне ўжо знайшло зацікаўленых  чытачоў і на радзіме, і ў іншых краінах свету.