Глыбокае

Палачане абралі месца для помніка Усяславу Чарадзею

Амаль месяц працягвалася грамадзкае абмеркаваньне,  у якім месцы горада найлепш усталяваць помнік  легендарнаму князю, пры якім Полацкае княства дасягнула найвышэйшага росквіту. Цікава, што думкі шэраговых грамадзянаў і спецыялістаў-архітэктараў на гэты конт супалі: помнік полацкаму князюУсяславу Чарадзею вырашана паставіць на скрыжаванні вуліцы  Ефрасінні Полацкай  з вуліцай  Кастрычніцкай.
Удзел у грамадскім абмеркаванні ўзялі некалькі соцень чалавек. Прапановы  ў пісьмовым выглядзе яны або дасылалі на адрас аддзелу ідэалагічнай працы Полацкага гарвыканкама, або проста кідалі свае лісты  ў адмысловую скрыню, усталяваную  побач з адміністратыўным  будынкам.
Намеснік старшыні аргкамітэта па ўсталяванні помніка, спецыяліст па абаронна-мабілізацыйных пытаннях Полацкага гарвыканкама Станіслаў Красоўскі распавёў, што найчасцей людзі прапаноўвалі ўсталяваць помнік каля Сафійскага сабора (які быў пабудаваны ў час княжання  Усяслава Чарадзея ), на валу Івана Жахлівага, каля Свята-Пакроўскага храма, побач з Домам афіцэраў, і ў дворыку музея кнігадрукавання. З усіх варыянтаў быў абраны найбольш прыдатны: на скрыжаванні вуліц паміж Спаса-Ефрасіньеўскай царквой і Сафійскім саборам.
Аўтарам помніка з’яўляецца мінскі скульптар Аляксандр Прохараў, які ўвасобіў полацкага князя  на кані ды ў баявым узбраенні. Стварэнне манумента каштуе прыкладна 300 мільёнаў рублёў. З іх каля 200  мільёнаў рублёў пойдзе на  аплату бронзы і ўласна  ліццё помніка. Праца скульптараў абыйдзецца ў 100 мільёнаў рублёў.  Дарэчы, грошы на помнік Усяславу Чарадзею таксама збіралі калектыўна: у Полацку з гэтай мэтай  прайшоў тэлемарафон, і грамадзяне – прыватныя асобы  ахвяравалі  каля 120 мільёнаў рублёў.
Плануецца, што ўрачыстае адкрыццё  помніка таленавітаму дзяржаўнаму дзеячу і палкаводцу, які кіраваў Полацкім  княствам з 1044  па 1101 гады, адбудзецца сёлета ў верасні. На жаль, да 1145-гадовага юбілею Полацка, што будзе адзначацца напрыканцы мая,  усталяваць манумент не паспеюць.