Глыбокае

У Докшыцкім раёне знойдзены і знішчаны падпольны самагонны завод

    Прадпрыемства  па вырабу самагону  знаходзілася  ў лесе недалёка ад вёскі Мураўшчына.  А ягоныя  "вытворчыя магутнасці" уразілі нават дасведчаных у такіх справах супрацоўнікаў міліцыі: адна толькі халадзільная ўстаноўка агрэгата мела аб"ём 200 літраў! 
    Побач з гіганцкім самагонным апаратам міліцыянеры знайшлі бочкі з 530-цю літрамі брагі. Невядомым пакуль застаецца толькі гаспадар падпольнае вытворчасці, а таксама штатныя ды пазаштатныя  супрацоўнікі, якіх зараз шукаюць праваахоўныя органы. 
    Паводле звестак аддзела інфармацыі і грамадзкіх сувязей МУС Віцебскага аблвыканкаму, за апошні час на тэрыторыі вобласці выкрыты і знішчаны ўжо  13 падобных  самагонных заводаў. Увогуле ж на Віцебшчыне ад пачатку 2007-га году  супрацоўнікі міліцыі выявілі 96 самагонных апаратаў і сканфіскавалі 57,5 т  самогону ды іншых  незаконна вырабленых алкагольных сурагатаў.