Глыбокае

Следчы Глыбоцкай пракуратуры вінаваціць гарэлку

    Адметнай рысай найбольш цяжкіх злачынстваў, зафіксаваных на тэрыторыі раёну, можна лічыць нецьвярозы стан удзельнікаў трагічных падзеяў – як саміх злачынцаў, так і пацярпелых. Гэтак лічыць следчы  пракуратуры Глыбоцкага раёну Віктар Лапушынскі. 
    У інтэрв"ю  абласной газеце "Народнае слова" В. Лапушынскі  згадвае паказальны выпадак, які адбыўся мінулам летам у вёсцы Абруб-Ластавіцкі. 
    Гісторыя, якая потым перерасла ў гучную судовую справу, пачыналася банальна: з сяброўскіх пасядзелак  у аднаго з вяскоўцаў. Гаспадар хаты і трое гасцей  выпілі ўжо не адну пляшку віна, калі  паміж імі завязалася сварка. Забыўшыся на  тое, як  за мінулай чаркай усе чацьвёра  пакляліся адно аднаму ў вечным сяброўстве, гаспадар вырашыў спагнаць даўнюю пазыку  са свайго  знаёмага. Атрымаўшы адмову,  ён схапіў сякеру ды кінуўся разганяць гасцей. У выніку тры  чалавекі атрымалі сур"ёзныя раненні, а гаспадар "гасціннай" хаты – 12 гадоў пазбаўлення волі. Віцебскі абласны суд кваліфікаваў ягоныя дзеянні як замах на забойства трох чалавек.
    Дарэчы, жыхары вёскі Абруб-Ластавіцкі распавядаюць, што раз"юшаны хлопец з сякерай, крыху працверазеўшы ды ўсвядоміўшы  сваю віну, сам папрасіў суседзяў выклікаць міліцыю і добраахвотна "здаўся" прадстаўнікам праваахоўных органаў.
    Следчы райпракуратуры Віктар Лапушынскі  таксама адзначае, што пакаянне пасля п"яных боек, дэбошаў ды крадзяжоў  -- гэта досыць распаўсюджаная з"ява. Аднак прызнанні накшталт "быў п"яны, нічога не памятаю" або "выпілі, а потым так атрымалася" суд зазвычай лічыць не апраўданнем для злачынцаў, а дадатковым адмоўным фактарам пры разглядзе справаў.