Глыбокае

У былых калгасах галадае жывёла

Яшчэ ў сярэдзіне сакавіка ў СВК “Цяцеркі” Браслаўскага раёна поўнасцю закончыліся травяністыя кармы на фермах гаспадаркі. Жывёла, якая апынулася на паўгалодным пайку, прыкметна схуднела. Упалі да 4 літраў у суткі надоі малака асноўных гуртоў, а яшчэ ж да выгану статку ў поле застаецца некалькі тыдняў.
Гэты прыкры факт быў агучаны на прайшоўшым у Докшыцкім раёне выязным пасяджэнні аблвыканкама, як ілюстрацыя незайздроснага становішча спраў цяпер і на шэрагу іншых калгасных фермаў Віцебшчыны. У ходзе праверак на заключным этапе зімоўкі статку высветлілася, што статкі шмат дзе недакормліваюць. У многіх гаспадарках у сярэдзіне красавіка не будзе чым карміць жывёлу. Цікава, што, згодна справаздач, кармоў на паперы быццам бы нарыхтавалі, а цяпер высвятляецца, што нестае корму і на фермах суседняга Шаркоўшчынскага і Пастаўскага раёнаў. Як паратунак, вясна ў гэтым годзе ранняя і цёплая выдалася, і прыйдзецца выганяць гурты на пасевы азімых, а найлепей завозіць кармы ад спраўных гаспадарак. На жаль, такіх гаспадарак у нас так ужо і мала, калі не сказаць, што шмат.